【估唔到呢套會成為左我喺UA睇既最後一套電影】
容許我離題一下唔講旅行，因為今朝睇到呢單新聞既時候實在太過震撼，完全冇諗過一個由細陪到我大既集團會突然間清盤。
細細個住沙田，最記得就係由中三開始，同三四個同學仔組成左電影黨，每個星期都搵一套新戲一齊睇。由於細個零用錢唔多，選擇亦唔多，除左運動之外，睇戲可以講係我地最大既娛樂。直到唔知邊年開始，UA沙田話要裝修，原本諗住都只係停一陣，冇諗到一整就整到我地幾個大學畢業都仲未開返。個陣時冇左UA沙田，我地每星期就總覺得少左d野咁，雖然有時都會特登去遠d搵其他戲院睇，但總係冇咁方便，所以我地既電影小組亦漸漸解散。
出黎做野之後，平時拍拖睇戲都係習慣性會搵返UA先，尤其係做左好多年會員，成日都會有唔同優惠同免費飛。雖然無可否認好多時佢地d設備都係比較舊同做得唔好，又成日俾人叫執左佢，但我諗冇乜人真係想呢件事真實發生。
不過無計，呢個武肺黎睇太突然，成個大世界都洗緊牌，旅遊、娛樂、飲食、零售等等都首當其充，好多大型品牌執完一間又一間，或者呢個真係地球對人類既一個報復。
無人知下一刻會係點，只可以話不久將來如果見到更多大型品牌結業真係一d都唔出奇，我地唯一可以做既就只有珍惜我地目前仲擁有既野，一齊努力撐過呢幾年。
Search